May 03 2025 | २०८२, वैशाख २१गते
काठमाडौं । आन्तरिक राजस्व विभागले चालु आर्थिक वर्षको सुरुको ८ महिनामा तोकिएको राजस्व आम्दानी लक्ष्य पूरा गर्न सकेको छैन् । फागुन मसान्तसम्म तोकिएको लक्ष्य भन्दा ७२ अर्ब बढी राजस्व आम्दानी कम असुल भएको विभागले जनाएको हो ।
विभागका सूचना अधिकारी आनन्दप्रसाद गुप्ताले सार्वजनिक गरेको जानकारी अनुसार चालु आर्थिक वर्षको फागुन मसान्तसम्म ३ खर्ब १० अर्ब ९४ करोड २९ लाख ५८ हजार राजस्व संकलन भएको र यो सो अवधिसम्म तोकिएको लक्ष्यको तुलनामा ७२ अर्ब ६१ करोड १७ लाख ७१ हजारले घटी हो । विभागले चालु आर्थिक वर्षको ८ महिनामा ३ खर्ब ८३ अर्ब ५५ करोड ४७ लाख २९ हजार राजस्व आम्दानी गर्ने लक्ष्य लिएको थियो ।
विभागले जनाए अनुसार राजस्व आम्दानी अन्तर्गत आयकरमार्फत १ खर्ब ३७ अर्ब ६५ करोड ८५ लाख ७३ हजार, घरभाडा करमार्फत १ अर्ब ५७ करोड १४ लाख ३२ हजाार, ब्याजकरमार्फत २७ अर्ब २ करोड २१ लाख ३३ हजार र मूल्य अभिवृद्धि कर (भ्याट)मार्फत ७५ अर्ब ३३ करोड ४६ लाख ८५ हजार आम्दानी भएको छ ।
यसैगरी विभागले अन्तःशुल्कबापत ६२ अर्ब ८१ करोड ४ लाख ९० हजार, स्वास्थ्य सेवा करमार्फत ४ अर्ब ३१ करोड ८५ लाख ९१ हजार, शिक्षा सेवा करमार्फत २ अर्ब ७ करोड ७१ लाख २४ हजार र अन्य शीर्षकमा १४ करोड ९९ लाख ३० हजार रुपैयाँ आम्दानी भएको जनाएको छ ।
© 2025 All right reserved to Nayasadak.com | Site By : Sobij
