Jul 11 2025 | २०८२, असार २७गते
काठमाडौँ ।नेपालको अर्थतन्त्रको आकार ६१ खर्ब रुपैयाँ पुगेको छ। अर्थ मन्त्रालयले सार्वजनिक गरेको तथ्यांकअनुसार यो गत आर्थिक वर्षको तुलनामा ४ खर्ब रुपैयाँले वृद्धि भएको हो। अघिल्लो वर्ष नेपालको कुल गार्हस्थ उत्पादन (GDP) ५७ खर्ब रुपैयाँको हाराहारीमा थियो।
राजस्व संकलनमा पनि उल्लेखनीय वृद्धि भएको देखिन्छ। एक वर्षको अवधिमा राजस्व संकलन १ खर्ब ८ अर्ब रुपैयाँले बढेको छ। त्यस्तै, पुँजीगत खर्च पनि गत वर्षको तुलनामा ३६ अर्ब रुपैयाँले वृद्धि भएको छ। निजी क्षेत्रमा प्रवाहित कर्जा ८.७ प्रतिशतले बढेको छ, जुन अघिल्लो वर्षको ५.६ प्रतिशत वृद्धिको तुलनामा सकारात्मक सुधार हो।
रेमिट्यान्स आप्रवाहमा १५.५ प्रतिशतले वृद्धि भएको छ भने, निर्याततर्फ ७७.८ प्रतिशतले वृद्धि भएको देखिएको छ। आयात पनि १३.१ प्रतिशतले बढेको छ। राष्ट्रिय तथ्यांक कार्यालयको सर्वेक्षणलाई आधार मान्दा अर्थतन्त्रका १८ वटा क्षेत्रहरू — जस्तै यातायात, निर्माण, खानी, विद्युत तथा ग्यास, व्यापार, बैंक तथा बीमा, उद्योग, कृषि, सूचना प्रविधि, शिक्षा, स्वास्थ्य, आवास तथा भोजन — सकारात्मक सूचकांकमा देखिएका छन्।
अर्थ मन्त्रालयका अनुसार, लगानीमैत्री वातावरण निर्माण हुँदै गइरहेको छ। नीतिगत तथा कानूनी सुधारतर्फ व्यापक प्रगति भएको उल्लेख गरिएको छ। आर्थिक कार्यविधि तथा वित्तीय उत्तरदायित्व ऐन, निजीकरण ऐन, भन्सार महसुल ऐन, बैंकिङ कसुर तथा सजाय ऐन लगायतका कानूनी दस्तावेजमा संशोधनहरू गरिएको छ।
त्यस्तै, वैकल्पिक विकास वित्त परिचालन विधेयक प्रतिनिधिसभामा पेश गरिनु, उच्चस्तरीय आर्थिक सुझाव सुधार आयोगको गठन र प्रतिवेदनको कार्यान्वयन सुरु हुनु, निजी तथा निर्माण क्षेत्रका गुनासा सुन्ने र समाधानतर्फ कदम चालिनु अर्थमन्त्रालयले महत्वपूर्ण उपलब्धि मानेको छ।
अन्ततः, लक्ष्यअनुसारको राजस्व संकलन, पुँजीगत खर्चमा वृद्धि, र 'ग्रे लिस्ट'बाट बाहिरिने चुनौती व्यवस्थापन गर्न अर्थतन्त्रले देखाएको प्रगति सकारात्मक रहेको छ।
© 2025 All right reserved to Nayasadak.com | Site By : Sobij
