Aug 09 2025 | २०८२, साउन २४गते
काठमाडौं । देशका जीवन बीमा कम्पनीहरूले आर्थिक वर्ष २०८०/८१ मा १ खर्ब ८१ अर्ब ४३ करोड रुपैयाँ बराबरको बीमा शुल्क संकलन गरेका छन्। नेपाल बीमा प्राधिकरणले सार्वजनिक गरेको तथ्यांकअनुसार, जीवन बीमा कम्पनीहरूको व्यवसायमा नेपाल लाइफ इन्स्योरेन्सले पुनः अग्रता कायम राखेको छ।
कुल जीवन बीमा बजारमध्ये नेपाल लाइफले मात्र २६.४८ प्रतिशत हिस्सा ओगट्दै ४८ अर्ब ३ करोड ८० लाख रुपैयाँ बीमा प्रिमियम संकलन गरेको छ। यसले कम्पनीलाई जीवन बीमा क्षेत्रमा सबैभन्दा ठूलो खेलाडी बनाएको छ।
नयाँ जीवन बीमा व्यवसाय विस्तारतर्फ पनि नेपाल लाइफकै अग्रता देखिएको छ। बीमा कम्पनीहरूले गत वर्षमा ४० अर्ब १७ करोड रुपैयाँ बराबरको नयाँ व्यवसाय थप्दा नेपाल लाइफले एक्लै १० अर्ब ४९ करोड रुपैयाँ बराबरको प्रथम बीमा शुल्क संकलन गरेको हो।
नेपाल लाइफपछिको स्थानका लागि नेसनल लाइफ र लाइफ इन्स्योरेन्स कर्पोरेसन नेपाल (एलआईसीएन) बीच प्रतिस्पर्धा देखिएको छ।
सिटिजन लाइफ, सानिमा रिलायन्स, मेट लाइफ, आईएमई लाइफ, प्रभु महालक्ष्मी लाइफ, रिलायवल नेपाल लाइफ र सन नेपाल लाइफ जस्ता कम्पनीहरूको बीमा शुल्क संकलन बजार हिस्सा भने ५ प्रतिशतभन्दा कम रहेको छ।
तथ्यांकले देखाउँछ कि जीवन बीमा बजारमा अझै पनि केही ठूला कम्पनीहरूको वर्चस्व छ। नेपाल लाइफको अग्रता कायम छ भने अन्य कम्पनीहरू विस्तारको दौडमा रहेका छन्। आगामी वर्षमा जीवन बीमा बजारमा प्रतिस्पर्धा अझ चर्किने देखिएको छ।
© 2025 All right reserved to Nayasadak.com | Site By : Sobij
