Aug 29 2025 | २०८२, भदौ १३गते
काठमाडौं। शिक्षा, विज्ञान तथा प्रविधि मन्त्रालय अन्तर्गतको सानोठिमीस्थित वैदेशिक अध्ययन अनुमतिपत्र (एनओसी) शाखामा करार कर्मचारी हटाइ स्थायी कर्मचारी पठाइएपछि नयाँ टोली नियुक्त गरिएको छ। यस कदमलाई लामो समयदेखि जरा गाडेर बसेका कर्मचारीले शाखामा अनियमितता बढाएको र विद्यार्थीलाई गाह्रो पार्ने व्यवहार रोक्नका लागि उठाइएको कदमका रूपमा व्याख्या गरिएको छ।
स्रोतका अनुसार, एनओसी शाखामा करारका कर्मचारीले सात–आठ वर्षसम्म काम गर्दै आएको थियो। तर, अनियमितता र घुसखोरीका घटनाको सार्वजनिक पर्दाफास भएपछि मन्त्रालयले तत्काल छानबिन टोली गठन गरी शाखामा सुधारका लागि कदम चाल्ने निर्णय गरेको थियो। छानबिन समितिले शाखामा नक्कली कागजात बनाएर पैसा असुली गरिएको र कर्मचारी र कन्सल्टेन्सीबीच मिलेमतो भएको निष्कर्ष निकालेको थियो।
मन्त्रालयका अधिकारीले बताएअनुसार, अब शाखामा विवादमा नपरेका र इमानदार स्थायी कर्मचारीको टोली पठाइएको छ। यस टोलीले विद्यार्थीका कागजात दुरुस्त, पारदर्शी र कानुनी प्रक्रियाअनुसार प्रशोधन गर्नेछ। यसअघि करार कर्मचारीले कम्प्युटरमा नक्कली योग्यतापत्र अपलोड गरेर एनओसी दिने काम गरेको पाइएको थियो।
विद्यार्थीका अनुसार, अमेरिका, अष्ट्रेलिया, क्यानडा र युरोप जस्ता देशका लागि एनओसी लिने क्रममा कर्मचारीहरूले करिब ३० हजारदेखि १ लाख रुपैयाँसम्म घुस असुली गर्ने गरेका थिए। धेरैजसो कर्मचारीले शाखामा अड्डा जमाएर बसेका र अन्यत्र सरुवा हुन पनि अस्वीकार गर्ने गरेको तथ्य सार्वजनिक भएको थियो।
शिक्षा मन्त्रालयले पाँच सदस्यीय कार्यदल गठन गरी प्रतिवेदन बुझाएको आधारमा नयाँ टोली नियुक्त गरेको हो। मन्त्रालयका अधिकारीले बताएअनुसार, “अब विद्यार्थीलाई गाह्रो हुँदैन र अनियमितता नियन्त्रण हुनेछ। विवादमा नआएका कर्मचारी मात्र शाखामा पठाइएको छ।”
यस कदमले वैदेशिक अध्ययन अनुमतिपत्र प्रणालीलाई पारदर्शी र व्यवस्थित बनाउने उद्देश्य राखेको मन्त्रालयले जनाएको छ।
© 2025 All right reserved to Nayasadak.com | Site By : Sobij
