May 09 2025 | २०८२, वैशाख २७गते
वीरगञ्ज । सुक्खा बन्दरगाह भन्सार कार्यालय सिर्सिया मार्फत् दशकौँ पुराना प्रिन्टिङ मेसिनहरू ल्याइएका छन् । केही दिन अगाडि दशकौँ पुराना प्रिनिटङ मेसिनहरू एलसी मार्फत् सुक्खा बन्दरगाह हुँदै भित्र्याउन खोजिएपछि भन्सार विभाग र सुक्खा बन्दरगाह भन्सार कार्यालयमा हंगामा मच्चिएको छ ।
दशकौँ पुराना प्रिन्टिङ मेसिनहरू किन आयात गरियो त्यो भने अनुसन्धान भइरहेको भन्सार विभाग स्रोतले बताएको छ । अहिले ती पुराना मेसिनहरू सुक्खा बन्दरगाह भन्सार कार्यालयले जफत गरेको छ । कार्यालयले जफत गरेर त्यसको अनुसन्धान गरिरहेको बुझिएको छ । भन्सार स्रोतका अनुसार ती प्रिन्टिङ मेसिनहरू सन् १९९० अगाडि बनेका छन् ।
भन्सार कानुनमा प्रिन्टिङ मेसिनको हकमा १० वर्षसम्म पुरानो र अन्य मेसिनको हकमा पाँच वर्षसम्म पुराना मेसिनहरू उद्योग विभागको सिफारिसमा ल्याउन पाउने व्यवस्था छ । यद्यपि सुक्खा बन्दरगाहबाट ल्याइएका प्रिन्टिङ मेसिनहरू सन् १९९० अगाडिकै रहेकोले उक्त मेसिनहरू जफत गरिएको भन्सार विभागका महानिर्देशक महेश भट्टराईले बताए ।
© 2025 All right reserved to Nayasadak.com | Site By : Sobij
