May 11 2025 | २०८२, वैशाख २९गते
काठमाडौं । रूसी राष्ट्रपति भ्लादिमिर पुटिनले युक्रेनसँग प्रत्यक्ष वार्ता सुरु गर्न आग्रह गरेका छन्। शनिबार साँझ क्रेमलिनबाट प्रसारित टेलिभिजन सम्बोधनमा पुटिनले द्वन्द्वको मूल कारण हटाएर दीर्घकालीन शान्तिको खोजी गर्न संवाद आवश्यक भएको बताएका हुन्।
उनले वार्ता सुरु गर्न १५ मेको मिति प्रस्ताव गरेका छन् र ढिलाइ नगरी वार्ता प्रक्रिया प्रारम्भ गर्नुपर्नेमा जोड दिएका छन्।
पुटिनको यो प्रस्ताव युरोपका दुई प्रभावशाली नेताहरू – बेलायतका प्रधानमन्त्री सर कीर स्टार्मर र फ्रान्सका राष्ट्रपति एम्यानुएल म्याक्रोंको युक्रेन भ्रमणपछि आएको हो। उनीहरूले रुसलाई कुनै पूर्वशर्त विना ३० दिनभित्र युद्धविराम घोषणा गर्न आह्वान गरेका थिए।
क्रेमलिनका प्रवक्ता दिमित्री पेस्कोभले उक्त प्रस्तावमाथि प्रतिक्रिया दिँदै, “हामी यसबारे सोच्नेछौं,” भनेका छन्। तर उनले साथमा चेतावनी पनि दिएका छन्, “दबाबको रणनीति हामीमाथि लागू हुँदैन।”
दुई वर्षभन्दा लामो समयदेखि जारी रुस–युक्रेन युद्धमा हजारौं मानिसको ज्यान गइसकेको छ भने लाखौं विस्थापित भएका छन्। अहिले पुनः उच्चस्तरीय कूटनीतिक प्रयासहरू सक्रिय हुँदै गएको देखिएको छ।
© 2025 All right reserved to Nayasadak.com | Site By : Sobij
