Nov 11 2025 | २०८२, कात्तिक २५गते
काठमाडौँ ।ग्वार्कोस्थित ओभरपासको निर्माण अन्तिम चरणमा पुगेको छ, यद्यपि अझै केही साना तर महत्त्वपूर्ण कार्यहरू बाँकी रहेको निरीक्षणपछि पाइएको छ। प्रतिनिधिसभा सदस्य माधव सापकोटाले निरीक्षणपछि जानकारी दिँदै बत्ती तथा सिसी क्यामेरा जडान जस्ता सुरक्षासम्बन्धी कामहरू बाँकी रहेको उल्लेख गरे। यस सम्बन्धमा मन्त्रालयका सचिव र सडक विभागका प्रमुखसहितका अधिकारीहरूसँग छलफल गरी आवश्यक निर्देशन दिइएको पनि उनले बताए।
फ्लाई ओभरको तीव्र निर्माणमा मन्त्री दाहालको चासो
भौतिक पूर्वाधार तथा यातायातमन्त्री देवेन्द्र दाहालले ग्वार्को चोकको फ्लाई ओभर निर्माणलाई चालु आर्थिक वर्षमै सक्ने उद्देश्यसहित निरन्तर अनुगमन गरिरहेका छन्। उनी स्वयं स्थलमा गई कामको प्रगति मूल्याङ्कन गर्दै सम्बन्धित निकायलाई समयमै निर्माण सम्पन्न गर्न निर्देशन दिँदै आएका छन्। काठमाडौंको ट्राफिक व्यवस्थापनमा ठूलो योगदान पुर्याउने विश्वास गरिएको यो परियोजनालाई समयमा सम्पन्न गर्न उनले जोड दिँदै आएका छन्।
अर्को वर्ष सुरुङ मार्ग केन्द्रित पूर्वाधार योजनाहरू
आगामी आर्थिक वर्ष २०८२/८३ का लागि सरकारको पूर्वाधार प्राथमिकता सुरुङमार्ग निर्माणतर्फ मोडिएको देखिन्छ। टोखा–छहरे–गुर्जु–भन्ज्याङ, हेम्जा–नयाँपुल, नयाँबानेश्वर अन्डरपास, सिद्धबाबा, खुर्कोट–चियाबारी लगायतका सुरुङमार्ग योजनाहरू चयनमा परेका छन्। यी योजना कार्यान्वयनमा आएपछि सडक सञ्जाल सहज हुने र ट्राफिकको दबाब व्यवस्थापनमा उल्लेखनीय सुधार हुने अपेक्षा गरिएको छ।
© 2025 All right reserved to Nayasadak.com | Site By : Sobij
