गाजा सिटी ।युद्धग्रस्त प्यालेस्टिनी क्षेत्रमा युद्धविरामका लागि नयाँ आह्वान बढ्दै जाँदा इजरायली सेनाले समुद्री किनारको विश्राम क्षेत्रमा २४ जनासहित कम्तीमा ५१ जनाको हत्या गरेको गाजाको नागरिक सुरक्षा एजेन्सीले जनाएको छ ।
इरानसँगको इजरायलको १२ दिने युद्धको द्रुत समाधानले गाजामा लडाइँ रोक्ने आशालाई पुनर्जीवित गरेको छ । गाजामा २० महिनाभन्दा बढीको लडाइँले २० लाखभन्दा बढी जनसङ्ख्याका लागि गम्भीर मानवीय अवस्था सिर्जना गरेको छ ।
इजरायली प्रधानमन्त्री बेन्जामिन नेतान्याहुले जुलाई ७ मा ह्वाइट हाउसको भ्रमण गर्नुहुने एक अमेरिकी अधिकारीले नाम नछाप्ने सर्तमा बताए ।
अमेरिकी राष्ट्रपति डोनाल्ड ट्रम्पले हालै इजरायललाई ‘गाजामा सम्झौता गर्न’ आग्रह गर्नुभएको छ भने इजरायली रणनीतिक मामिलामन्त्री रोन डर्मर यस हप्ता अमेरिकी अधिकारीहरूसँग वार्ताका लागि वासिङ्टन जाँदै हुनुहुन्छ ।
तर इजरायलले प्यालेस्टिनी क्षेत्रभरि आफ्नो आक्रमण जारी राखेको छ ।
गाजाको नागरिक सुरक्षा एजेन्सीले सोमबार इजरायली सेनाले गाजा सहरको समुद्री किनारमा रहेको विश्राम क्षेत्रमा गरेको आक्रमणमा २४ जनासहित ५१ जनाको मृत्यु भएको बताएको छ ।
हमलामा मारिनेहरूमध्ये फोटो पत्रकार इस्माइल अबु हाताब पनि रहेको हमास सरकारको मिडिया कार्यालयले जनाएको छ ।
नागरिक रक्षा प्रवक्ता महमुद बासलले मध्य र दक्षिणमा ११ वटा सहायता केन्द्रहरूसहित गाजाभरि इजरायली आक्रमणमा २७ जनाको मृत्यु भएको बताउनुभयो ।
मे महिनाको अन्त्यमा इजरायलले सहायता दिन थालेपछि हालैका हप्ताहरूमा वितरण केन्द्रहरू नजिकै प्यालेस्टिनीहरूको बारम्बार हत्या भएको प्रत्यक्षदर्शी र स्थानीय अधिकारीहरूले रिपोर्ट गरेका छन् ।
दक्षिणी सहर खान युनिसमा सहायता खोज्नेहरूले रफाहमा इजरायली सेनाले गोली हानेको बताएपछि मृतक र घाइतेहरूलाई ओपन–टप ट्रेलरमा अस्पताल लगिएको थियो।
नासेर अस्पतालमा एएफपी फुटेजमा घाइतेहरूलाई रगतले दाग लागेको भुइँमा उपचार भइरहेको देखाइएको छ ।
नागरिक सुरक्षा रिपोर्टका बारेमा इजरायली सेनाले तुरुन्तै कुनै टिप्पणी गरेको छैन ।
शुक्रबार ट्रम्पले गाजामा ‘अर्को हप्ताभित्र’ नयाँ युद्धविरामको आशा गरिरहेको बताउनुभएको थियो ।
