Jul 12 2025 | २०८२, असार २८गते
काठमाडौँ । नेपाल राष्ट्र बैंकले हालै सार्वजनिक गरेको मौद्रिक नीतिमार्फत बैंक तथा वित्तीय संस्थाहरूको सेवा प्रणाली सुधार गर्न विभिन्न व्यवस्था ल्याएको छ। अबदेखि बैंक तथा वित्तीय सेवा प्रदायक संस्थाहरूले ग्राहकको पहिचान (केवाईसी) विवरण राष्ट्रिय परिचयपत्रमार्फत विद्युतीय रूपमा प्राप्त गर्न सक्ने व्यवस्था गरिएको छ। यसले एक बैंकमा विवरण अद्यावधिक गरेपछि अन्य संस्थाहरूले सो विवरण सजिलै प्रयोग गर्न सक्ने पूर्वाधार निर्माणमा सहयोग पुर्याउनेछ। ग्रामीण क्षेत्रमा वित्तीय पहुँच र साक्षरता अभिवृद्धि गर्न राष्ट्र बैंकले ‘ऋणीसँग नेपाल राष्ट्र बैंक’ कार्यक्रम सञ्चालन गर्ने भएको छ, जसअन्तर्गत ऋणीहरूसँग प्रत्यक्ष संवाद गरिनेछ। यसका साथै, कर्जा असुली प्रक्रियामा देखिने अवाञ्छित गतिविधिबाट सिर्जित जोखिमलाई न्यूनीकरण गर्न राष्ट्र बैंकले सम्बन्धित सरकारी निकायहरूसँग समन्वय गर्दै जाने नीति लिएको छ।
बैंकहरूमा निष्क्रिय खाताको संख्या अत्यधिक देखिएको सन्दर्भमा यसबाट उत्पन्न हुने सम्भावित जोखिमलाई ध्यानमा राख्दै निष्क्रिय खाता न्यूनीकरणका लागि कार्ययोजना बनाई कार्यान्वयन गरिने भएको छ। विदेशी भ्रमणमा जाने नेपाली नागरिकका लागि सटही सुविधा समेत बढाइएको छ। अब भारतबाहेक अन्य मुलुकहरूमा जान चाहने नेपालीले प्रतिपटक तीन हजार अमेरिकी डलरसम्म सटही गर्न सक्नेछन्, जुन हालको सटही दरअनुसार झन्डै ४ लाख ११ हजार रुपैयाँ बराबर हुनेछ। त्यस्तै, भन्सारमा स्वःघोषणा गर्नुपर्ने नगद विदेशी मुद्राको सीमामा पुनरावलोकन गरिनेछ भने विदेशमा रहेको नेपाली नागरिक वा संस्थाको नाममा भएको विदेशी विनिमयको विवरण प्रस्तुत गर्ने प्रक्रियालाई सहज बनाइनेछ। अन्ततः, बंगलादेश, श्रीलंका लगायत विदेशी मुद्राको कारोबार विस्तार भइरहेका मुलुकहरूको मुद्रा परिवर्त्य विदेशी मुद्राको सूचीमा थपिनेछ, जसले ती देशका पर्यटकहरूलाई नेपालमा सहज रूपमा रुपैयाँमा सटही सेवा उपयोग गर्न सक्ने वातावरण बनाउनेछ।
© 2025 All right reserved to Nayasadak.com | Site By : Sobij
