ढाका ।बङ्गलादेशको एक स्कुलमा प्रशिक्षण लडाकू जेट दुर्घटना हुँदा २५ बालबालिका र अन्य दुई जनासहित २७ जनाको मृत्यु भएपछि मङ्गलबार परिवारहरू र शिक्षकहरू भेला भएका छन् । यो दशकौँको सबैभन्दा घातक विमान दुर्घटना हो ।

चिनियाँ निर्मित एफ–७ बिजेआई विमान माइलस्टोन स्कुल एन्ड कलेजमा खसेको बेला अधिकांश पीडित विद्यार्थीहरू भर्खरै कक्षाबाट बाहिर निस्किएका थिए ।

“अहिलेसम्म २७ जनाको मृत्यु भइसकेको छ । तीमध्ये २५ जना बालबालिका र एक जना पाइलट छन्”, स्वास्थ्य तथा परिवार कल्याण मन्त्रालयका मुख्य सल्लाहकारका विशेष सहायक सैयदुर रहमानले २० जनाको मृत्यु सङ्ख्यालाई अद्यावधिक गर्दै भन्नुभयो, “विभिन्न अस्पतालमा ७८ जनाको उपचार भइरहेको छ ।”

दुर्घटनामा १७० जनाभन्दा बढी घाइते भएका कारणबारे अनुसन्धान गरिरहेको सेनाले जनाएको छ ।

सामान्यतया व्यस्त रहने स्कुल मङ्गलबार बिहान एकदमै शान्त थियो, कक्षाहरू रद्द गरिएको थियो ।

“बालबालिकासहित स्कुलले पनि ज्यान गुमाइसकेको छ”, आफ्नो छोरा मुस्किलले दुर्घटनाबाट बचेका ४५ वर्षीय शिक्षक शहादत होसेनले भन्नुभयो, “प्रभावित भवनको अगाडि दुईवटा झुला छन् । खाजा समय र स्कुलपछि बालबालिकाहरू त्यहाँ खेल्छन् । हिजो पनि विमान दुर्घटना भएको समयमा विद्यार्थीहरू ती झुलामा थिए ।”

स्कुलमा लगभग सात हजार विद्यार्थी भर्ना भएका छन् । तीमध्ये अबुल बशारको छैटौँ कक्षाका छोरा पनि छन् र उनको सबैभन्दा मिल्ने साथी मारिएका छन् ।

“उनी दुर्घटना हुनुभन्दा दुई वा तीन मिनेट अगाडि मात्र बाहिर निस्किएका थिए”, बशारले भन्नुभयो, “उनी रातभर सुत्न सकेनन् र आज बिहान उनलाई स्कुल ल्याउन मलाई बाध्य तुल्यायो ।”

– बालबालिकाहरूको आघात –

स्कुल अधिकारीहरूले घटनास्थलबाट बालबालिकाका झोलाहरू, जुत्ताहरू र परिचयपत्रहरू सङ्कलन गरेका छन् ।

वरिष्ठ प्रहरी अधिकारी पह्न चक्माले सशस्त्र बलका कर्मचारीहरूले अझै पनि क्षेत्र सफा गरिरहेको बताउनुभयो ।

“उनीहरूले त्यस ठाउँलाई पछि प्रहरीलाई हस्तान्तरण गर्नेछन् र त्यसपछि हामीले कुनै पनि मानव अवशेष वा विद्यार्थी र अन्यको सामानसहित प्रमाण सङ्कलन गर्नेछौँ”, उहाँले भन्नुभयो ।

ड्युटीमा रहेका वायु सेनाका कर्मचारीहरूले सोमबार राति लडाकू जेटको अवशेषहरू हटाइएको बताए, तर उनीहरूले अझै प्रमाणका लागि साइट खोजी गरिरहेका छन् ।

“बालबालिकाहरूलाई यो आघातबाट मुक्त गर्न, सामान्य अवस्थामा फर्कन कति समय लाग्नेछ मलाई थाहा छैन”, शिक्षक होसेनले भन्नुभयो ।

सोमबार राति स्कुल अधिकारीहरूले परिसरमा प्रार्थना गरे ।

बङ्गलादेशका अन्तरिम नेता मुहम्मद युनुसले यस घटनामा ‘गहिरो शोक र दुःख’ व्यक्त गर्दै एक दिनको राष्ट्रिय शोक घोषणा गर्नुभएको छ ।

“वायु सेना, विद्यार्थी, अभिभावक, शिक्षक र माइलस्टोन स्कुल र कलेजका कर्मचारी र यस दुर्घटनाबाट प्रभावित अन्यको क्षति अपूरणीय छ”, उहाँले भन्नुभयो, “यो राष्ट्रका लागि गहिरो पीडाको क्षण हो ।”

सेनाले जेटले ‘कथित रूपमा मेकानिकल समस्या सामना गर्दा’ पाइलट, फ्लाइट लेफ्टिनेन्ट तौकीर इस्लाम नियमित प्रशिक्षण मिसनमा रहेको बताएको छ ।

इस्लामले विमानलाई घना जनसङ्ख्या भएका क्षेत्रहरूबाट टाढा सार्ने प्रयास गरेको तर ‘आफ्नो सक्दो प्रयासका बावजुद’ दुई तले विद्यालय भवनमा ठोक्किएको सेनाले सोमबार जनाएको छ ।