Aug 30 2025 | २०८२, भदौ १४गते
काठमाडौँ।प्रेस सेन्टर नेपालले अनलाइन सञ्चारमाध्यमको दर्ता तथा नवीकरण जिल्ला प्रशासन (सिडियो) कार्यालयबाट गर्नुपर्ने व्यवस्थाको विरोध गरेको छ। सेन्टरले आज एक विज्ञप्ति जारी गर्दै सो व्यवस्था प्रेस स्वतन्त्रता विरोधी रहेको र यसले संघीयतालाई कमजोर पार्ने बताएको हो।
विज्ञप्तिमा भनिएको छ, “सरकारले पुरानो ३४ वर्षे ऐनलाई संशोधन गरेर आमसञ्चारमाध्यम नियमन गर्न खोज्नु गलत हो। बदलिँदो राजनीतिक परिप्रेक्ष्यअनुसार सञ्चारसम्बन्धी छाता ऐन बनाइनु आवश्यक छ।”
सेन्टरका महासचिव मनोज घर्तीमगरद्वारा हस्ताक्षरित विज्ञप्तिमा सञ्चार माध्यमको दर्ता, नवीकरण तथा नियमन संघीय संरचनाअनुसार हुनु पर्नेमा सिडियो कार्यालयमार्फत गरिनु संघीयता विरोधी कार्य भएको उल्लेख छ।
प्रेस सेन्टरले मिडिया नियमनलाई पारदर्शी, संघीय संरचनासँग मिल्दोजुल्दो र स्वतन्त्रतापूर्ण बनाउन तत्काल छाता ऐन निर्माणको मागसमेत गरेको छ।
© 2025 All right reserved to Nayasadak.com | Site By : Sobij
