Aug 22 2025 | २०८२, भदौ ६गते
काठमाडौँ। निजी विद्यालय सञ्चालकहरूले माइतीघर मण्डलादेखि नयाँ बानेश्वरसम्म संसदीय समितिबाट पारित भएको शिक्षा विधेयकको विरोध प्रदर्शन गरेका छन् । निजी तथा आवासीय विद्यालय अर्गनाइजेशन नेपाल (प्याब्सन) र राष्ट्रिय निजी तथा आवासीय विद्यालय एसोसिएसन नेपाल (एनप्याब्सन)को अगुवाइमा सो विरोध प्रदर्शन गरिएको हो ।
माइतीघरमा भेला भएर नारा लगाउँदै उनीहरूले विद्यालय शिक्षा विधेयकका केही प्रावधानको विरोध गरेका हुन् । शुक्रबार बिहान मात्रै उनीहरूले आफ्ना सवारी चक्रपथमा परिक्रमा गराएका थिए । विद्यालयहरूको छाता संगठनहरूले ८ गतेसम्म माग पूरा नभए ९ गतेदेखि निजी विद्यालय बन्द गरेर आन्दोलन गर्ने घोषणा गरेका छन्। उनीहरूले यसबारे बिहीबार एक पत्रकार सम्मेलन आयोजना गरी जनाएका थिए ।
विद्यालय शिक्षा विधेयकमा समावेश पूर्ण छात्रवृत्ति, विद्यालयमा उत्पादन नहुने सामग्री उपलब्ध गराउने प्रावधान खारेज गर्नुपर्ने, विद्यालयहरूलाई ‘गैरनाफामुलक’ बनाउँदै लगिने भन्ने प्रावधान हटाइनुपर्ने लगायतका माग उनीहरूले राखेर आन्दोलन घोषणा गरेका छन्।
© 2025 All right reserved to Nayasadak.com | Site By : Sobij
