Sep 15 2025 | २०८२, भदौ ३०गते
काठमाडौँ । नवनियुक्त अर्थमन्त्री रामेश्वर खनालले पदभार ग्रहण गरेर कर्मचारीहरूसँग ब्रिफिङ र निर्देशन गर्ने क्रममा एक व्यक्तिले आक्रोश पोखेका छन् । पर्वतका शालिकराम पौडेलले आक्रोश पोखेका हुन् ।
‘७ वटा जिल्लालाई मात्रै तोकेर बजेट बनाइएको छ । हाम्रा गाउँकालाई बजेट छैन,’ कर्मचारीलाई आफूले बोलेको कुरा नोट गर्न निर्देशन दिइरहेका मन्त्री खनालको छेउमा पुगेका पौडेलले भने ।
त्यसपछि मन्त्री खनालले ‘एक छिन ल’ भन्दै रोक्दा उग्र शैलीमा भने ‘हामीले पनि आन्दोलन गरेका हौँ । तपाईँ त्यसै मन्त्री भएको हो र ? कुरा सुन्नुस् यहाँ,’ भन्दै आक्रोश व्यक्त गर्न थाले पछि प्रहरीले उनलाई तानेको थियो ।
तर उनी नरोकिएपछि मन्त्री खनालले हात मिलाउँदै ‘हुन्छ, हजुरको शुभ नाम के पर्यो ?’ भनेर सोधेका थिए । जवाफमा पौडेलले आफ्नो परिचय दिँदै मन्त्रालयमा बदमासहरू रहेकोले आन्दोलन भएको बताएका थिए । ‘एक छिन मन्त्री भएर हुन्छ, काम गर्न कति सजिलो छ र ?’ उनले प्रश्न गरेका थिए ।
उनले मौजुदा बजेट यिनै सचिवहरूले बनाएकोले हटाउन माग गरेका थिए ।
© 2025 All right reserved to Nayasadak.com | Site By : Sobij
