Nov 05 2025 | २०८२, कात्तिक १९गते
काठमाडौँ । चालु आर्थिक वर्ष २०८२/८३ को पहिलो महिनामा बैङ्क तथा वित्तीय संस्थामा रहेको निक्षेप ५५ अर्ब ७९ करोडले घटेर ७२ खर्ब आठ अर्ब नौ करोडमा सीमित भएको छ । यो अघिल्लो वर्षको सोही अवधिमा ४३ अर्ब ४५ करोडको गिरावटसँग मिल्दोजुल्दो भए पनि, यस पटक निक्षेपमा कमी देखिँदा कर्जा प्रवाहमा समेत असर परेको छ ।
नेपाल राष्ट्र बैंकको तथ्याङ्कअनुसार समीक्षा अवधिमा निजी क्षेत्रतर्फको कर्जा २ अर्ब ९३ करोड अर्थात् ०.१ प्रतिशतले घटेर ५४ खर्ब ९५ अर्ब पुगेको छ । यद्यपि वार्षिक आधारमा भने निजी क्षेत्रतर्फ कर्जा ८.० प्रतिशतले बढेको देखिन्छ ।
निक्षेप संरचनामा मुद्दती निक्षेपको अंश घटेर ४८.४ प्रतिशतमा झरेको छ भने बचत निक्षेप ३७.५ प्रतिशत पुगेको छ, जसले तरलता व्यवस्थापनमा नयाँ चुनौती थपेको छ । संस्थागत निक्षेप अघिल्लो वर्षको तुलनामा अलिकति घट्दै ३५.१ प्रतिशतमा सीमित भएको छ ।
क्षेत्रगत कर्जा प्रवाह हेर्दा औद्योगिक उत्पादन, निर्माण तथा सार्वजनिक सेवा क्षेत्रमा कर्जा सानो मात्रामा बढेको छ भने सेवा उद्योग, थोक तथा खुद्रा व्यापार र उपभोग्य क्षेत्रमा कर्जा घटेको छ । साथै, आवधिक, मार्जिन र रियलस्टेट कर्जा वृद्धि भए पनि हायर पर्चेज, नगद प्रवाह र अधिविकर्ष कर्जा घटेको देखिन्छ ।
© 2025 All right reserved to Nayasadak.com | Site By : Sobij
