Oct 27 2025 | २०८२, कात्तिक १०गते
एयर फोर्स वन । अमेरिकी राष्ट्रपति डोनाल्ड ट्रम्पले सोमबार आफ्ना रुसी समकक्षी भ्लादिमिर पुटिनले हालै गरेको आणविक–सञ्चालित क्रुज मिसाइल परीक्षणलाई ‘उचित कदम होइन’ भनी टिप्पणी गर्नुभएको छ ।
राष्ट्रपति ट्रम्पले एयर फोर्स वनमा सञ्चारकर्मीहरूसँग कुरा गर्दै भन्नुभयो, “राष्ट्रपति पुटिनले अहिले युद्ध ९युक्रेनमा० अन्त्य गर्नुपर्छ । यो युद्ध एक हप्ताभित्र सकिनुपर्ने थियो, तर अब चाँडै चौथो वर्षमा प्रवेश गर्न लागेको छ । मिसाइल परीक्षण गर्नुको सट्टा उहाँले शान्तिको बाटो रोज्नुपर्छ ।”
रुसी राष्ट्रपति पुटिनले आइतबार ‘ब्युरेभेस्टनिक’ नामक आणविक–सञ्चालित क्रुज मिसाइलको अन्तिम सफल परीक्षण सम्पन्न भएको घोषणा गर्नुभएको थियो । सो मिसाइलको दायरा ‘असीमित’ रहेको दाबी उहाँले गर्नुभएको थियो ।
राष्ट्रपति ट्रम्पले यसअघि ह्वाइट हाउसमा पुनः पदभार सम्हालेपछि युक्रेनमा भइरहेको युद्ध छिट्टै अन्त्य गर्ने प्रतिबद्धता व्यक्त गर्नुभएको थियो । तर, अमेरिकी राष्ट्रपतिको मध्यस्थता प्रयासका बावजुद मस्को र किएभबीचको वार्ता हाल पूर्णरूपमा रोकिएको छ ।
यसबीच, रुसी सेनाहरू विस्तारै तर स्थिर रूपमा युक्रेनमा आफ्नो नियन्त्रण विस्तार गरिरहेका छन् । किएभ पक्ष भने लामो र महँगो युद्धको बोझ वहन गर्दै कठिन रक्षात्मक मोर्चामा अडिएको देखिन्छ ।
राष्ट्रपति ट्रम्पले भन्नुभयो, “विश्वलाई स्थायित्व चाहिएको हो, प्रतिस्पर्धात्मक शस्त्र परीक्षण होइन । अब सबै देशहरूले संयमता अपनाउनुपर्छ ।”
© 2025 All right reserved to Nayasadak.com | Site By : Sobij
