Nov 10 2025 | २०८२, कात्तिक २४गते
काठमाडौँ । धितोपत्र बोर्ड अध्यक्ष नियुक्तिका लागि फेरि शुरु गरिएको पुरानो प्रक्रिया फेरि रोकिएको छ ।अध्यक्ष नियुक्तिका लागि प्रक्रिया अन्तर्गत छानिएर सर्टलिस्टमा परेका बाँकी ३ उम्मेदवारलाई अन्तर्वार्ता तथा कार्ययोजना प्रस्तुत गर्न शुक्रबार सिंहदरबार बोलाइए अनुसार कार्य रोकिएको हो ।शुक्रबार पनि यी तीन जनाको अन्तर्वार्ता तथा कार्ययोजना प्रस्तुत हुन सकेन ।
अध्यक्ष सिफारिसका लागि गठित समितिका संयोजक, राष्ट्रिय योजना आयोगका उपाध्यक्ष डा. शिवराज अधिकारी तथा तीन उम्मेदवार सहभागी नै नभएपछि अन्तर्वार्ता तथा कार्ययोजना प्रस्तुत गर्ने कार्य रोकिन पुगेको छ ।तीन उम्मेदवार बोर्डका कार्यकारी निर्देशक नवराज अधिकारी, बीमा प्राधिकरणका पूर्व अध्यक्ष चिरञ्जिवि चापागाईं तथा नेप्सेका सीईओ कृष्णबहादुर कार्कीलाई शुक्रबार अन्तर्वार्ता तथा कार्ययोजना प्रस्तुत गर्न बोलाइएको थियो ।
सर्टलिस्टमा परेर पनि यसअघि यी तीन उम्मेदवार अन्तर्वार्ता तथा कार्य योजना प्रस्तुतीमा सहभागी नभएपछि गठित सिफारिस समितिले नाम सिफारिस गर्न सकेको थिएन ।नाम सिफारिस हुन नसकेपछि सरकारले नयाँ प्रक्रिया सुरु गर्न समितिका तिनै सदस्य रहनेगरी अर्को सिफारिस समिति बनाएको थियो । सर्टलिस्टमा परेका एक उम्मेदवार सन्तोषनारायणले नयाँ प्रक्रिया सुरु गर्ने कानुनी व्यवस्था नभएको भन्दै सर्वोच्च अदालतमा मुद्दा हालेपछि अदालतले नयाँ प्रक्रिया सुरु नगर्न आदेश दिँदै माघ ३० गतेका लागि पेशी तोकेको थियो ।
तर पुरानै प्रक्रियाबाट अध्यक्ष नियुक्ति गर्न बाटो खुला भएपछि यी तीन उम्मेदवारलाई आज अन्तर्वार्ता तथा कार्ययोजना प्रस्तुत गर्न बोलाइए पनि कार्य अगाडि बढेन् ।
धितोपत्र बोर्ड २०८० पुस २० पछि कार्यकारी अध्यक्षविहीन छ । अर्थमन्त्रालयबाट सञ्चालक समितिमा प्रतिनिधित्व गर्ने महेश बरालले अध्यक्षको जिम्मेवारी सम्हाल्दै आएका छन् । यद्यपि सार्वजनिक निष्कासन लगायत बोर्डका धेरै कामहरु प्रभावित हुँदै आएका छन् ।
© 2025 All right reserved to Nayasadak.com | Site By : Sobij
