Jun 27 2025 | २०८२, असार १३गते
काठमाडौँ । अहिले देशभर मनसुनी प्रणाली सक्रिय रहँदा अधिकांश स्थानको मौसम बदली भइरहेको छ। मौसम पूर्वानुमान महाशाखाका अनुसार विशेष गरी देशका पहाडी तथा हिमाली भूभागमा आंशिकदेखि सामान्य बदली र थुप्रै ठाउँमा हल्कादेखि मध्यम वर्षा भइरहेको छ।
कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा वर्षा भइरहेको महाशाखाले जनाएको छ। दिउँसो देशका पहाडी भूभागमा मौसम साधारणतया बदली रहनेछ भने बाँकी भूभागमा आंशिकदेखि सामान्य बदलीको अवस्था रहने अनुमान गरिएको छ।
यस्तै, पहाडी क्षेत्रमा चट्याङसहित हल्कादेखि मध्यम वर्षा र एक–दुई स्थानमा भारी वर्षाको सम्भावना रहेको जनाइएको छ। साथै, उच्च पहाडी तथा हिमाली क्षेत्रमा हिमपात हुने सम्भावना पनि रहेको छ।
तराई क्षेत्र विशेषगरी कोशी, बागमती, गण्डकी र लुम्बिनी प्रदेशमा हावाहुरी चल्ने सम्भावना रहेको भन्दै सतर्कता अपनाउन भनिएको छ।
आज रातिसम्म कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा चट्याङसहित वर्षा जारी रहनेछ। ती प्रदेशका एक–दुई स्थानमा भारीदेखि धेरै भारी वर्षा हुने अनुमान गरिएको छ, जसका कारण नदीहरूको जल सतह बढ्न सक्ने, भूक्षय, बाढी र पहिरोको जोखिमसमेत बढ्न सक्ने सम्भावना छ।
यस प्रकारको मौसमको असरले जनस्वास्थ्य, कृषि, यातायात र दैनिक जनजीवन प्रभावित हुन सक्ने हुँदा पूर्वतयारी र सावधानी आवश्यक भएको महाशाखाको भनाइ छ। विशेषगरी जोखिमयुक्त क्षेत्रका बासिन्दालाई सतर्क रहन, नदी किनाराबाट टाढा रहन, र आवश्यक सुरक्षा उपाय अपनाउन आग्रह गरिएको छ।
© 2025 All right reserved to Nayasadak.com | Site By : Sobij
