Aug 29 2025 | २०८२, भदौ १३गते
काठमाडौँ । नयाँसडक बुलेटिनमा यहाँहरूलाई स्वागत छ। आज भदौ १३ शुक्रबार । यस्ता छन् दिनभरी घटेका मुख्यमुख्य आर्थिक समाचारहरू.....
घरजग्गा कारोबार गर्न लाइसेन्स लिनुपर्ने , नलिएको पाइए जरिवाना तिर्नुपर्ने व्यवस्था
काठमाडौं। सरकारले घरजग्गा कारोबारका लागि लाइसेन्स लिनुपर्ने व्यवस्था कार्यान्वयनमा ल्याउँदै छ । यसका लागि सरकारले सात वर्षपछि मालपोत नियमावली संशोधन गरेको छ। नेपाल राजपत्रमा मालपोत नियमावलीमा गरिएको ८औं संशोधन बिहीबार प्रकाशन गरिएको छ।
मालपोत ऐनमा इजाजत लिनुपर्ने व्यवस्था गरिएयता डेढ वर्षपछि नियमावलीमा समावेश गरिएको हो।सम्पत्ति शुद्धीकरण तथा व्यावसायिक वातावरण प्रवर्धन सम्बन्धी केही नेपाल ऐनलाई संशोधन गर्ने ऐनमार्फत घरजग्गा कारोबारका लागि इजाजत लिनुपर्ने व्यवस्था २०८० चैतमा गरिएको थियो।ऐनको व्यवस्था बमोजिम मालपोत नियमावलीमा घरजग्गा कारोबारको इजाजतपत्र सम्बन्धी व्यवस्था थपिएको छ।
वणिज्यका डीजीको कीर्ते हस्ताक्षर गरी आयात गरिएको पोस्तादाना केराउ भन्सारमा रोकियो, कीर्ते आयातमा कुलेश्वरका रमेशकुमार जालान र वीरगञ्जका पवनकुमार साह संलग्न
काठमाडौँ । वाणिज्य विभागका महानिर्देशक र शाखा अधिकृतको कीर्ते हस्ताक्षर गरी आयात गरिएको पोस्तादाना केराउ वीरगञ्ज भन्सारमा रोकिएको छ ।काठमाडौँ कुलेश्वरका व्यापारी रमेशकुमार जालान र वीरगञ्जका व्यापारी पवनकुमार साहले नकली कागज कीर्ते गरी आयात गर्न खोजिएको पोस्तादाना केराउ वीरगञ्जमा रोकिएको हो ।वीरगञ्जका प्रमुख भन्सार अधिकृत रामप्रसाद पाठकले डकुमेन्ट पूरा नभएकाले रोकिएको जानकारी सार्वजनिक गरेका हुन् ।
कोशी प्रदेशमा तीन हजार रोजगारी सिर्जना हुने परियोजना सञ्चालन
विराटनगर। कोशी प्रदेश सरकारले साना तथा मझौला व्यवसायको प्रवद्र्धन र उद्यमशीलताको विकासका लागि स्विस सरकारको सहयोगमा ‘उदय’ परियोजना सुरु गरेको छ । यस परियोजनाबाट प्रदेशमा रोजगारी सिर्जनासहित आर्थिक समृद्धिको नयाँ ढोका खुल्ने अपेक्षा गरिएको छ । ‘उदय परियोजनाअन्तर्गत स्वीकृत सेवा प्रदायकमार्फत व्यवसाय विकास सेवा उपलब्ध गराइनेछ । रु ६० करोडको ‘ग्यारेन्टी’ फन्डमार्फत रु आठ अर्ब बराबरको कर्जा सुरक्षा गरिने र रु २८ करोडको ‘च्यालेञ्ज फन्ड’मार्फत प्रवद्र्धनात्मक तथा प्रतिस्पर्धात्मक क्षमता अभिवृद्धि गर्ने लक्ष्य राखिएको छ । यसबाहेक ‘इनफर्मेसन पोर्टल’मार्फत बजारसम्बन्धी सूचना उपलब्ध गराउने व्यवस्था पनि परियोजनाले गर्नेछ । परियोजनाअन्तर्गत बिना धितो रु ३० लाखदेखि रु तीन करोडसम्मको कर्जा उपलब्ध गराइने र त्यसका लागि बैङ्क छनोटको प्रक्रिया अघि बढाइएको छ । कोशी प्रदेश सरकारका अनुसार, उदय परियोजनाले प्रदेशमा उद्यमशीलताको विकाससँगै ठूलो सङ्ख्यामा रोजगारी सिर्जना गर्ने र आर्थिक आधारलाई मजबुत पार्ने लक्ष्य लिएको छ । परियोजनाको प्रभावकारी कार्यान्वयनका लागि कार्यविधि तयार भइसकेको र अब कार्यान्वयन चरणमा प्रवेश गरेको छ ।
सामाजिक सुरक्षाभत्ता पाउने सेवाग्राही खोज्दै स्थानीय तह
गोरखा।गाउँलेको अत्याधिक बसाइँसराइ भएपछि गोरखाका गाउँपालिकाहरूको सेवा दिने तौरतरिका पनि फेरिन थालेको छ । अहिले गाउँपालिकाले सामाजिक सुरक्षाभत्ता पाउने सेवाग्राही खोज्दै कर्मचारीलाई गोरखा बजार, चितवन र काठमाडौँमा खटाउन थालेका छन् । बारपाक सुलिकोट गाउँपालिका, सिरानचोक, अजिरकोट, धार्चे, चुमनुब्री र आरुघाट गाउँपालिकाले गोरखा बजार, काठमाडौँ र चितवनका सहरमा पुगेर सामाजिक सुरक्षाभत्ताको कार्ड नवीकरण शिविर सञ्चालन गरेको हो । सिरानचोक गाउँपालिकाका प्रमुख प्रशासकीय अधिकृत ठाकुरप्रसाद अर्यालका अनुसार कर्मचारीको टोली खटाएर विभिन्न मितिमा सहरमा शिविरि सञ्चालन गरिएको छ । “काठमाडौँमा साउन ३०, ३१, भदौ १ र २ गते घुम्ती शिविर सञ्चालन गरेर सामाजिक सुरक्षा भत्ता नवीकरण गरे, जसबाट २५० जनाले सेवा लिए । चितवनमा यही बिहीबार र शुक्रबार शिविर सञ्चालन भइरहेको छ ।
उद्योग, वाणिज्य तथा आपूर्ति मन्त्री मन्त्री दामोदर भण्डारी द्वारा ‘इलेक्ट्रिक एंड इलेक्ट्रोनिक्स’ अन्तर्राष्ट्रिय प्रदर्शनी उद्घाटन
काठमाडौं । उद्योग, वाणिज्य तथा आपूर्ति मन्त्री श्री दामोदर भण्डारीले शुक्रबार भृकुटीमण्डपमा नेपाल इलेक्ट्रिक पावर एण्ड लाइटस् तथा नेपाल कन्जुमर इलेक्ट्रोनिक्स एंड होम अपलायनसेस अन्तर्राष्ट्रिय प्रदर्शनीको चौथो संस्करणको उद्घाटन गरेका छन् ।
मिडिया स्पेस सोल्युसनस्, फ्युचरेक्स ट्रेड फेर एण्ड इवेंट्स, तथा एक्जीबीसन एंड ट्रेड सर्विसेस इंडिया प्रालिले सयुक्त रुपमा आयोजना गरेको प्रदर्शनीको सहयोगी संस्था नेपाल विद्युत प्राधिकरण तथा नेपाल सौर्य विद्युत उत्पादक संघ रहेका छन् ।
स्वदेशी तथा विदेशी कम्पनीहरुका १०० भन्दा बढी स्टलहरु रहको प्रदर्शनीमा उच्च गुणस्तरका अत्याधुनिक एवं नवीनतम प्रविधिका ट्रान्समिसन तथा डिष्ट्रिव्यूसन सामाग्री, उर्जा आपूर्ति तथा कन्ट्रोल डिभाइस्, हाउस वायरिङ्गका सामाग्री, तार, केबुल एवं कण्डक्टर, अत्याधुनीक प्रकारका स्वीचहरु, एलइडी लाइटिङ्ग, इलेक्ट्रोनिक्स उपकरण, घरेलु विद्युतीय उपकरणहरू, चारजिङ्ग स्टेशन, ब्याट्री, कार्यालयमा प्रयोग हुने विद्युतीय प्रविधि तथा अन्य विद्युतीय सामग्रीका कम्पनीहरुको सहभागिता रहेको छ ।
१० बैंकको लेखापरीक्षण गर्न बंगलादेशी कम्पनीसँग राष्ट्र बैंकले सम्झौता ग-यो
काठमाडौँ । नेपाल राष्ट्र बैंकले ठूला १० वाणिज्य बैंकका सम्पत्तिको गुणस्तर परीक्षण गर्नका लागि छनोट गरिएको बंगलादेश परीक्षण गर्ने कम्पनीसँग सम्झौता गरेको छ ।शुक्रबार बंगलादेशको हाउलादार युनुस एन्ड कम्पनी, चार्टर्ड एकाउन्टेन्ट्सँग १० बैंकका सम्पत्तिको गुणस्तर परीक्षण गर्न नेपाल राष्ट्र बैंकले सो सम्झौता सम्झौता गरेको हो । राष्ट्र बैंकले सार्वजनिक खरिद ऐन, २०६३ को दफा ३८ (२) बमोजिम प्राविधिक र वित्तीय प्रस्ताव मूल्यांकनका आधारमा उक्त कम्पनीलाई छनोट गरेको छ ।
उक्त कम्पनीले सन् २०२५ को डिसेम्बर अन्तिमसम्म उक्त कम्पनीले गुणस्तर परिक्षण गर्ने राष्ट्र बैंकको सम्पत्ति तथा सेवा व्यवस्थापन विभागका कार्यकारी निर्देशन रोशन कुमार सिग्देलले जानकारी सार्वजनिक गरेका हुन् । उक्त कम्पनीसँग वाणिज्य बैंकको सम्पत्ति गुणस्तर परीक्षणका लागि ४ करोड ३७ लाख ४५ हजार रुपैयाँमा सम्झौता भएको हो । उक्त कम्पनीले मर्जर तथा प्राप्तिमा गएका ग्लोबल आईएमई बैंक, नबिल बैंक, नेपाल इन्भेस्टमेन्ट मेगा बैंक, कुमारी बैंक, लक्ष्मी सनराइज बैंक, हिमालयन बैंक र प्रभु बैंक रहेका छन् । साथै एनआईसी एसिया, एनएमबि, राष्ट्रिय वाणिज्य बैंकको पनि सम्पत्तिको गुणस्तर परीक्षण गर्नेछ ।
दशैं–तिहार अघि बजारमा आयोडिनयुक्त नुनको अभाव, उपभोक्ता ३० रुपैयाँसम्म तिर्न बाध्य
काठमाडौँ । दशैं, तिहारजस्ता चाडपर्व नजिकिँदै जाँदा बजारमा आयोडिनयुक्त नुनको अभाव देखिन थालेको छ। खुद्रा व्यापारीहरुले नुनको सर्टेज भएको भन्दै उपभोक्तालाई फर्काउने गरेका छन्।
पछिल्ला दिनमा अधिकांश किराना तथा स्टोरमा नुन नपाएको उपभोक्ता गीता कँडेलले बताइन्। ‘ठूला स्टोरमा समेत नुन छैन, व्यापारीले सर्टेज भएको भन्दै फर्काउँछन्,’ उनले भनिन्।
व्यापारीहरुले भने नुनको बिक्रीबाट नाफा नआउने भएकाले राख्न छाडेको दाबी गरेका छन्। गत २०८१ असार १८ मा साल्ट ट्रेडिङ कर्पोरेसनले आयोडिनयुक्त नुनको मूल्य १७ रुपैयाँबाट बढाएर २३ रुपैयाँ पुर्याएको थियो।
रामहरि खतिवडा संसदीय सुनुवाइ समितिको सदस्यमा, ईश्वरीदेवी न्यौपाने राज्य व्यवस्था समितिको सभापति
काठमाडौँ । नेपाली कांग्रेसका सांसद रामहरि खतिवडालाई संसदीय सुनुवाइ समितिको सदस्य बनाइने भएको छ। कर्मचारीको कुलिङ पिरियडसम्बन्धी गडबडीका कारण विवादमा आएपछि उनले राज्य व्यवस्था समितिको सभापतिको पदबाट राजीनामा दिएका थिए।
सो राजीनामाको जानकारी आज दिउँसो १ बजे बस्ने प्रतिनिधि सभा बैठकमा सभामुख देवराज घिमिरेले गराउनेछन्।
खतिवडाले राजीनामा दिएपछि संसदीय सुनुवाइ समितिकी सभापति ईश्वरीदेवी न्यौपानेलाई राज्य व्यवस्था समितिको सभापति तोकिएको छ। उनी यसअघि सुनुवाइ समितिको पनि सभापति थिइन्।
घट्दो ब्याजदरबीच जीवन बीमा कम्पनीको मुद्दती निक्षेप १३.८४% ले बढ्यो
काठमाडौँ । घट्दो ब्याज दरका बाबजुद जीवन बीमा कम्पनीहरुले बैंक तथा वित्तीय संस्थामा मुद्दती निक्षेप रकम बढाएका छन्।
आर्थिक वर्ष २०८०/८१ मा १४ वटा जीवन बीमा कम्पनीहरुले विभिन्न बैंक तथा वित्तीय संस्थामा जम्मा ५ खर्ब २१ अर्ब ३६ करोड १६ लाख रुपैयाँ मुद्दती निक्षेपमा राखेकाेमा २०८१/८२ मा यो रकम १३.८४ प्रतिशतले बढेर ५ खर्ब ९३ अर्ब ५१ करोड २७ लाख रुपैयाँ पुगेको छ।
जीवन बीमा कम्पनीहरुले आफूसँग भएको लगानीयोग्य रकमको ठूलो हिस्सा बैंक तथा वित्तीय संस्थामा मुद्दती निक्षेपको रुपमा राख्ने गरेका छन्। यद्यपि, अहिले संस्थागत निक्षेपको ब्याज दर ३ प्रतिशतभन्दा तल झरेको भए पनि लगानी निर्देशिकाले मुद्दती निक्षेपमा राख्नै पर्ने बाध्यता भएकाले निक्षेप रकम बढेको हो।
सुनको मूल्यमा नयाँ कीर्तिमान ,शुक्रबार सुनको मूल्य तोलाको दुई लाख ६ सय कायम
काठमाडौँ। सुनको मूल्यमा नयाँ कीर्तिमान कायम भई शुक्रबार सुनको मूल्य तोलाको दुई लाख ६ सय कायमकायम भएको छ । रु एक हजार २०० ले वृद्धि भई अहिले सम्मकै सर्वाधिक उच्च मूल्य रु दुई लाख ६०० निर्धारण भएको हो ।
स्थानीय बजारमा बिहीबारको तुलनामा आज सुनचाँदीको मूल्य तोलामा रु एक हजार २०० ले वृद्धि भएको छभने त्यति नै परिमाणको चाँदी रु पाँचले बढेको छ । नेपाल सुनचाँदी व्यवसायी महासङ्घका अनुसार आज एक तोला सुनको मूल्य रु दुई लाख ६०० निर्धारण भएको छ ।
जलवाष्पयुक्त हावाको प्रभाव बढेसँगै मनसुन केही सक्रिय
काठमाडौँ। बङ्गालको खाडीबाट जलवाष्पयुक्त हावाको प्रभाव बढेसँगै मुलुकका केही भागमा मनसुन केही सक्रिय भएको छ । जल तथा मौसम विज्ञान पूर्वानुमान महाशाखाले हाल मनसुन न्यूनचापीय रेखाको सरदर स्थानको आसपासमा अवस्थित रहेको जनाएको छ ।
आज दिउँसो देशभर बदली हुने छभने सबै प्रदेशका पहाडी भेगमा हल्कादेखि मध्यम वर्षाको सम्भावना छ । साथै कोशी, गण्डकी र सुदूरपश्चिम प्रदेशका केही भागमा भारी वर्षाको सम्भावना छ । त्यसैगरी, आज राति देशभर आंशिकदेखि साधारणतया बदली हुनेछ । कोशी र सुदूरपश्चिम प्रदेशका एकदुई स्थानमा भारी वर्षाको सम्भावना छ । महाशाखाले वर्षाका पहिरो तथा गेग्रान बहाव (डेब्रिज फ्लो)को जोखिम रहेको, ठूला तथा साना नदीनाला र खोलाहरूमा पानीको सतह बढ्न सक्ने तथा यातायात क्षेत्र प्रभावित हुनसक्ने प्रक्षेपण गर्दै सबैलाई सतर्क रहन तथा पूर्वतयारी गर्न अनुरोध गरेको छ ।
नेप्सेमा हाथवे इन्भेष्टमेन्ट र ४ म्युचुअल फन्डको मूल्य समायोजन, बोनस शेयर र नगद लाभांश समायोजन पछि नयाँ मूल्य कायम
काठमाडौं। नेपाल स्टक एक्सचेञ्ज (नेप्से) मा हातवे इन्भेष्टमेन्ट (HATHY) र चार म्युचुअल फण्डहरुको मूल्य समायोजन गरिएको छ। समायोजनअन्तर्गत हातवे इन्भेष्टमेन्टको १२ प्रतिशत बोनस शेयर समायोजन गरिएको छ भने सिटिजन्स सुपर ३० म्युचुअल फण्ड (C30MF) को १२.७५ प्रतिशत, प्रभु सेलेक्ट फण्डको १२ प्रतिशत, एनएमबि सुलभ इन्भेष्टमेन्ट फण्ड २ (NSIF2) को १५ प्रतिशत र एनएमबि ५० (NMB50) को १५ प्रतिशत नगद लाभांश समायोजन गरिएको छ।
समायोजनपश्चात नयाँ मूल्यहरु यस प्रकार छन्:
भ्रष्टाचारको पर्दाफासपछि शाखामा करार हटाइ स्थायी कर्मचारी सरुवा, अनियमितता रोक्ने नयाँ टोली परिचालन
काठमाडौं। शिक्षा, विज्ञान तथा प्रविधि मन्त्रालय अन्तर्गतको सानोठिमीस्थित वैदेशिक अध्ययन अनुमतिपत्र (एनओसी) शाखामा करार कर्मचारी हटाइ स्थायी कर्मचारी पठाइएपछि नयाँ टोली नियुक्त गरिएको छ। यस कदमलाई लामो समयदेखि जरा गाडेर बसेका कर्मचारीले शाखामा अनियमितता बढाएको र विद्यार्थीलाई गाह्रो पार्ने व्यवहार रोक्नका लागि उठाइएको कदमका रूपमा व्याख्या गरिएको छ।
स्रोतका अनुसार, एनओसी शाखामा करारका कर्मचारीले सात–आठ वर्षसम्म काम गर्दै आएको थियो। तर, अनियमितता र घुसखोरीका घटनाको सार्वजनिक पर्दाफास भएपछि मन्त्रालयले तत्काल छानबिन टोली गठन गरी शाखामा सुधारका लागि कदम चाल्ने निर्णय गरेको थियो। छानबिन समितिले शाखामा नक्कली कागजात बनाएर पैसा असुली गरिएको र कर्मचारी र कन्सल्टेन्सीबीच मिलेमतो भएको निष्कर्ष निकालेको थियो।
सहुलियतपूर्ण कर्जा : १ खर्ब ४० अर्ब स्वीकृत, ७८ अर्बभन्दा बढी अझै प्रवाह हुन बाँकी
काठमाडौं । सहुलियतपूर्ण कर्जाअन्तर्गत बैंक तथा वित्तीय संस्थाबाट १ खर्ब ४० अर्ब रुपैयाँ बराबरको ऋण स्वीकृत भएको छ। तर, असार मसान्तसम्म ६२ अर्ब ३ करोड मात्रै प्रवाह भइसकेको छ भने अझै ७८ अर्ब ६६ करोड रुपैयाँ कर्जा प्रवाह हुन बाँकी रहेको नेपाल राष्ट्र बैंकले जनाएको छ।
सरकारले २०७२ सालदेखि सहुलियतपूर्ण कर्जा प्राथमिकतामा राखे पनि २०७५ सालपछि मात्र प्रभावकारी रूपमा प्रवाह हुन थालेको हो। तर, पछिल्ला वर्षमा सरकारले बैंकहरूलाई ब्याज अनुदान उपलब्ध नगराउँदा कर्जा प्रवाह सुस्त भएको बैंकरहरूको भनाइ छ। बैंकहरूले करिब १० अर्ब रुपैयाँ ब्याजअनुदान पाउन बाँकी रहेको उल्लेख गर्दै यस्ता कर्जा विस्तार गर्न हिच्किचाहट देखाएका छन्।
पालिकामा अब ‘निमित्त प्रमुख प्रशासकीय अधिकृत’ छैन : १२२ उपसचिव र ९७ शाखा अधिकृतको सरुवा
काठमाडौं । संघीय मामिला तथा सामान्य प्रशासन मन्त्रालयले एकैपटक १२२ जना उपसचिव र ९७ जना शाखा अधिकृतको सरुवा गरेको छ। तीमध्ये अधिकांशलाई गाउँपालिका र नगरपालिकामा प्रमुख प्रशासकीय अधिकृत (प्रमुख प्रशा. अ.) का रूपमा खटाइएपछि देशभरका पालिकामा अब ‘निमित्त प्रमुख प्रशासकीय अधिकृत’ शून्य भएको दाबी गरिएको छ।
मन्त्री भगवती न्यौपानेले स्थानीय तह पुनर्संरचना पश्चात् पहिलोपटक देशभरका नगरपालिका तथा गाउँपालिकामा दरबन्दी अनुसारका प्रमुख प्रशासकीय अधिकृत खटाइएकाले पूर्ण जिम्मेवारीसहितको प्रशासनिक नेतृत्व सुनिश्चित भएको बताइन्।
सिरहामा भन्सार छलीका कपडासहित भारतीय स्कारपियो बरामद
सिरहा । लहान नगरपालिका–१९ स्थित छारापट्टि चोकमा भन्सार छली गरिएको सामानसहित एक भारतीय स्कारपियो गाडी सशस्त्र प्रहरीले नियन्त्रणमा लिएको छ ।
बिहीबार साँझ करिब ८ः०० बजे सशस्त्र प्रहरी बल नेपाल सुरक्षा बेसक्याम्प लहानबाट सशस्त्र प्रहरी नायब उपरीक्षक विजयकुमार चौधरीको कमाण्डमा खटिएको मोबाइल टोलीले ठाडी–लहान भित्री सडकखण्डमा सवारी जाँच गर्ने क्रममा बिआर०१ पिबी ४६४२ नम्बरको सेतो रङ्गको भारतीय स्कारपियो गाडीलाई रोक्न खोज्दा उक्त गाडी तीव्रगतिमा भागेको सशस्त्र प्रहरीले जनाएको छ ।
यस्तो छ भदौ १३ गतेका लागि विदेशी मुद्राको विनिमयदर
काठमाडौँ । नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ । राष्ट्र बैंकका अनुसार अमेरिकी डलर एकको खरिदर १३९ रुपैयाँ ९१ पैसा र बिक्रीदर १४० रुपैयाँ ५१ पैसा कायम भएको छ ।
युरोपियन युरो एकको खरिदर १६३ रुपैयाँ २५ पैसा र बिक्रीदर १६३ रुपैयाँ ९५ पैसा, युके पाउन्ड स्ट्रलिङ एकको खरिदर १८९ रुपैयाँ १४ पैसा र बिक्रीदर १८९ रुपैयाँ ९६ पैसा, स्वीस फ्र्याङ्क एकको खरिददर १७४ रुपैयाँ ८८ पैसा र बिक्रीदर १७५ रुपैयाँ ६३ पैसा कायम गरिएको छ ।
अष्ट्रेलियन डलर एकको खरिददर ९१ रुपैयाँ ३५ पैसा र बिक्रीदर ९१ रुपैयाँ ७४ पैसा, क्यानेडियन डलर एकको खरिदर १०१ रुपैयाँ ६४ पैसा र बिक्रीदर १०२ रुपैयाँ ०८ पैसा, सिङ्गापुर डलर एकको खरिददर १०९ रुपैयाँ ०३ पैसा र बिक्रीदर १०९ रुपैयाँ ५० पैसा निर्धारण गरिएको छ ।
© 2025 All right reserved to Nayasadak.com | Site By : Sobij
