Aug 30 2025 | २०८२, भदौ १४गते
एजेन्सी । पश्चिम अफ्रिकी मुलुक गाम्बियाबाट स्पेनको क्यानरी टापुतर्फ प्रस्थान गरेको डुंगा मौरिटानियाको समुद्री क्षेत्रमा डुब्दा कम्तीमा ६९ जना प्रवासीको मृत्यु भएको छ ।
बीबीसीका अनुसार दुर्घटनापछि अझै धेरै जना बेपत्ता छन् भने १७ जनालाई जीवितै उद्धार गरिएको छ । करिब १६० यात्रु बोकेको उक्त काठको डुंगा गाम्बियाबाट निस्केको र यात्रुहरू प्रायः गाम्बिया र सेनेगलका नागरिक रहेको बताइएको छ ।
उद्धारमा परेकाहरूले दिएको जानकारीअनुसार, डुंगा दुर्घटनाभन्दा करिब ६ दिनअघि गाम्बियाबाट प्रस्थान गरेको थियो । दुर्घटना मौरिटानियाको राजधानी नोउआकचोटबाट करिब ६० किलोमिटर उत्तरमा भएको हो ।
मौरिटानियाली तटरक्षक अधिकारीहरूका अनुसार, मंगलबार राति यात्रुहरूले तटीय सहरका बत्ती देखेपछि एकैपटक एउटैपट्टि जम्मा हुँदा डुंगा असन्तुलित भई पल्टिएको हो ।
यद्यपि एटलान्टिक महासागर हुँदै युरोप प्रवेश गर्ने बाटो निकै जोखिमपूर्ण छ, पछिल्ला वर्षहरूमा यो मार्ग अफ्रिकी प्रवासीहरूका लागि नियमित बनेको देखिन्छ ।
सन् २०२४ मा मात्र करिब ४७ हजार प्रवासी क्यानरी टापु पुगेका थिए । तर, स्पेनी गैरसरकारी संस्था कामिनान्दो फ्रोन्टेरासका अनुसार, युरोप पुग्ने क्रममा ९ हजारभन्दा बढी प्रवासीले ज्यान गुमाएका छन् ।
© 2025 All right reserved to Nayasadak.com | Site By : Sobij
