Aug 31 2025 | २०८२, भदौ १५गते
झापा। कोशी प्रदेशका मुख्यमन्त्री हिक्मतकुमार कार्कीले अलैँची उत्पादन र व्यवसाय प्रवर्द्धनमा प्रदेश सरकारबाट पूर्ण सहयोग हुने प्रतिबद्धता व्यक्त गर्नुभएको छ।
विर्तामोडमा नेपाल अलैँची व्यवसायी महासङ्घको पाँचौँ महाधिवेशनलाई सम्बोधन गर्दै उहाँले नर्सरीदेखि बजार प्रवर्द्धनसम्म आवश्यक नीतिगत निर्णय र स्रोतसाधन उपलब्ध गराइने बताउनुभयो। साथै, उत्पादन र निकासी वृद्धि गर्ने नीतिगत तयारी भइरहेको जानकारी दिनुभयो।
मुख्यमन्त्री कार्कीले साना तथा मझौला व्यवसाय प्रवर्द्धन र उद्यमशीलता विकासका लागि स्वीस सरकारसँग सहकार्यमा ‘उदय परियोजना’ सञ्चालनमा रहेको उल्लेख गर्दै, “रु ३० लाखदेखि तीन करोडसम्म साना तथा मझौला उद्योगमा लगानी गरिरहेका छौँ,” भन्नुभयो।
उहाँले अलैँची, चिया, बाँस र दुग्ध पदार्थजस्ता क्षेत्रमा उत्पादन र बजार विस्तार गर्न सके कोशी प्रदेश छिट्टै समृद्धि यात्रामा अघि बढ्ने विश्वास व्यक्त गर्नुभयो। साथै, चियाको कार्यालय काठमाडौँमा नभई उत्पादन क्षेत्रमै हुनुपर्ने धारणा पनि राख्नुभयो।
महासङ्घका अध्यक्ष निर्मला भट्टराईले वार्षिक रु ७ देखि १० अर्बसम्मको अलैँची निर्यात भइरहेको जानकारी दिँदै भोजपुर र सङ्खुवासभालाई समेटेर अलैँची ‘सुपरजोन’ स्थापना गर्न सरकारसँग आग्रह गर्नुभयो।
महाधिवेशनमा १६ जिल्लाका प्रतिनिधिहरूको सहभागिता रहेको थियो। त्यस अवसरमा उत्कृष्ट निर्यातकर्ता, उत्कृष्ट किसान र उत्कृष्ट कर्मचारीलाई पुरस्कार प्रदान गरिएको थियो।
© 2025 All right reserved to Nayasadak.com | Site By : Sobij
